Psa 62 | JAE | STEP | Aêŋoc katuc gêôŋ Anôtô ŋaŋêŋgeŋ gebe eŋ oc ênam aê sa.

Psalms 62

PESALEM 62

Anôtô taugeŋ eŋ lamuanô

1 Aêŋoc katuc gêôŋ Anôtô ŋaŋêŋgeŋ
gebe eŋ oc ênam aê sa.
2 Eŋ taugeŋ kêtu ŋoc poclabu ma ŋoc gêjam-sawaga.
Eŋ kêtu ŋoc laimôkê, tec oc jaku sa samucgeŋ atom.

3 Amac samob aboa taôm sa api ŋac tageŋ abe aku eŋ tulu
amboac tuŋ, taŋ kêôpac kwanaŋgeŋ naŋ, e êndêŋ ondocgeŋ.
4 Êsêac taêŋ gêjam biŋ tageŋ tonec gebe têtiŋ eŋ aŋga nê lêpôŋ.
Êsêac têntac gêwiŋ biŋdansaŋ. Aweŋsuŋ gêjam mec, mago nêŋ ŋalêlôm kêpuc boa.

5 O ŋoc katuc, ôôŋ Anôtô ŋaŋêŋgeŋ
gebe eŋ kêtu aê kakêŋ matoc ŋamôkê.
6 Eŋ taugeŋ kêtu ŋoc poclabu ma ŋoc gêjam-sawaga.
Eŋ kêtu ŋoc laimôkê, tec oc jaku sa atom.
7 Anôtô kêtu ŋoc moasiŋ to waec ŋamôkê.
Anôtô kêtu ŋoc poctêna, taŋ gaê lamu naŋ.

8 O ŋoc lauac, taêm êka eŋ ŋapaŋ. Ansêwa nêm ŋalêlôm sa êndêŋ eŋ.
Anôtô kêtu aêacnêŋ lamu.

9 Ŋamalac ŋaôma latuŋi têtôm gêŋ ŋajaô-jaô, kasêga latuŋi têtôm gêŋ ŋanômê.
Embe tanam dôŋ êsêac, oc dôŋ êmandi êsêac sa gebe samob ŋagaô kêlêlêc ŋajaô-jaô su.
10 Taêm êka ŋaclai êkôniŋ ŋamalac tôŋŋa atom ma akêŋ mateŋ gebe ajaŋgo gêŋŋa atom.
Embe nêm awa êtu taêsam, naŋ nêm ŋalêlôm êsap tôŋ atom.

11 Anôtô kêsôm biŋ kêtu dim tageŋ, mago aê gaŋô biŋ luagêc kêsêp tau lêlôm gebe
Anôtô eŋ ŋaclai.
12 Ma aôm Apômtau, kôtu têmtac gêwiŋ teŋgeŋŋa ŋatau
gebe aôm kôkêŋ ŋagêjô gêdêŋ ŋamalac kêtôm gêŋ samob, taŋ êsêac sêgôm naŋ.
^{▼▼Dawidnê pesalem teŋ.}